政情：何偉權留港度歲 自創一日遊路線
新春假期係港人外遊嘅旺季，商界助更生委員會主席何偉權（Ken）往年都會趁假期同家人出埠旅行，但今年佢就搞搞新意思，同太太留港消費。大年初一、二佢哋食完早餐後，就開車遊勻港九新界。過年時難免大魚大肉，佢兩公婆兩晚都喺茶餐廳醫肚，包括喺深水埗歎熱辣辣嘅蛋撻同奶茶等地道美食，大呼過癮。
發掘本地旅遊寶藏
阿Ken話香港過年節目都好精彩，如果唔想去人多嘅地方，都有唔同嘅玩法。今次佢哋就開車去咗大嶼山、東涌、粉嶺嘅蓬瀛仙館同元朗，第二日就去海洋公園玩，坐吓纜車、食吓咖喱魚蛋，玩得好開心。
今次自創本地「自駕遊」路線，令阿Ken有所感觸，認為香港有好多「寶藏」，值得規劃幾條一日遊路線推介畀市民同遊客。例如去蓬瀛仙館拜佛食齋、蜂園買蜜糖，然後夜晚入流浮山食海鮮，咁樣既抵玩抵食，又可促進零售市道。佢咁有計，唔知會唔會向旅發局獻計呢？