政情：對沖講數 商會出招 議員甩難
強積金對沖問題爭議不斷，政府之前更加喺《施政報告》提出將強積金對沖機制「劃線」，並訂明喺「死線」日期之後，僱主唔可以再用自己嘅供款部分用嚟對沖遣散費或長期服務金，方案今年六月底前就會敲定，但呢個建議令工商界有極大反響。據了解，四大商會有初步計劃，將會聯同多個屬會，先評估方案對社會嘅影響，再爭取多名有工商界背景嘅立法會議員喺背後支持，希望政府可以調整方案。咁就意味身兼行政會議成員嘅商界議員包括林健鋒、廖長江同飲食界嘅張宇人唔需要直接同政府「講數」，避免做爛頭蟀。
其實工商界喺舊年底已收到消息，政府將喺《施政報告》提出要長遠取消強積金對沖機制，當時經民聯已急急腳同四大商會、中小企商會等代表開會商討方案。嗰時工商界已經講到明強烈反對取消強積金對沖，即使政府肯提供過渡期資助，都只不過係「溫水煮蛙」，僱主講到尾都係要同時為僱員嘅強積金供款同預留儲備，等將來可以畀遣散費或長期服務金，更加形容係百分百影響所有大中小企，影響工商界同香港經濟發展。
爭取六月底前調整方案
而喺新一份《施政報告》提出以劃線制逐步取消強積金對沖，但方案推出前並冇諮詢商界或勞工界，加上政府日前拒絕承諾將合約制非公務員納入到方案之中，變相只係將工商界拖落水。消息透露，四大商會計劃聯同百幾個屬會，先評估方案對社會嘅影響，再爭取工商界嘅立法會議員喺背後支持，之後會約見政府代表商討，期望當局喺六月底前會調整方案。
雖然坊間估計，取消對沖嘅方案由草擬到提交立法會審議都唔會趕得切喺現屆政府任期內完成，但客觀效果係令身兼行會成員嘅商界議員廖長江、林健鋒、飲食界嘅張宇人等避免做爛頭蟀，唔使直接同政府講數。
老實講，喺政府定咗政策方向之後，行會成員負責幫政府拉票，亦唔可以公開反對政府，可能因為廖長江、林健鋒同張宇人身份好尷尬，四大商會先諗出呢條橋令佢哋唔使上前線打仗，而係企喺後方避風頭。