政情：賭輸鐵路通車日 朱立威有拖冇欠
早喺港鐵南港島延線通車消息發布之前，幾位南區區議員就以魚蛋粉作賭注，輸賭南港島線係咪能夠如期通車。如今已經通車逾一個月，賭輸嘅區議員朱立威就遲遲未找數，唔通佢願賭唔服輸？
朱立威話數一定會找，只係時間問題啫，更揚言食餐魚蛋粉唔使好多時間，實會找數咁話。佢其後解釋，因為通車消息公布時，與特首選舉委員會分組界別選舉時間接近，而同樣賭輸嘅議員林玉珍就因參選而要避嫌，所以先拖到通車後先找數囉！咁點解到依家都未找到數呢？佢就話因為議員陳家珮喺一月頭生咗BB，正係休養當中，所以仍然未能找數，但佢已經先送上幾罐奶粉畀對方嘞！
稱南港島線帶旺南區
通車之後，南區都熱鬧咗好多，朱立威話以前離遠望位於鴨脷洲嘅玉桂山，行山人數相當疏落，但通車後就變得人頭湧湧。不過，佢就估計南區租金唔會再上升，認為租金早喺興建港鐵時已經升咗咁話。希望佢今次唔好再估錯喇！