政情：醫管局新春跑 上演星球大戰
公立醫院醫護人員除照顧病人出色外，原來扮嘢都有一手！尋日係醫院管理局年度盛事─新春長跑，吸引逾五千名醫院職員同家屬參加，創歷年紀錄。連星球大戰嘅天行者、莉亞公主同比卡超等都有嚟撐場，場面好熱鬧。
醫管局尋日喺威爾斯親王醫院舉行新春長跑，為該局慈善基金籌募經費。為增加活動氣氛，設有「反斗服裝大比拼」比賽，所以有唔少「特別嘉賓」到場打氣。九龍中醫院聯網物理治療部經理劉慕儀粉墨登場，扮演星球大戰嘅莉亞公主，聯同黑武士、BB-8機械人等到場為健兒加油，氣勢磅礡。
賽事共5500人參加
醫管局主席梁智仁同行政總裁梁栢賢都睇到心癢癢，玩埋一份。平日佢哋都西裝look大家就見得多，扮起星球大戰嘅天行者，揸住激光劍，都似模似樣㗎！九龍中聯網最後成為「反斗服裝大比拼」優勝隊伍之一，無白費一眾同事嘅心機。
長跑賽事分為十一公里同六點五公里，大會亦設有三公里醫管局主席邀請步行賽，所有賽事均以威院作起點同終點。今年吸引五千五百人參加，為醫管局慈善基金籌到逾百萬元善款。