政情：狂人揸旗 雙陳喪膽
被外界喻為「狂人」嘅特朗普就任美國總統，無論喺美國、歐洲甚至東南亞地區都有人擔心佢會搞到全球立立亂，就連港府嘅財金官員都唔例外。新上任財政司司長嘅陳茂波（波叔）同埋財經事務及庫務局局長陳家強尋日發表網誌，不約而同都話特朗普上任後每日都有爭議性嘅決定，憂慮美國新政策會傾向保護主義，為香港帶來影響，唔能夠掉以輕心喎。波叔上任財爺時曾畀人批評過佢唔夠班，加埋輔助佢嘅陳家強，依家畀特朗普嚇到騰晒雞，真係冇眼睇囉！
波叔尋日喺網誌大吐苦水，話特朗普上任以來幾乎每日都有爭議言論同決定，又不時批評有主要經濟體以貨幣貶值嚟增加貿易競爭優勢，憂慮美國新政策會傾向保護主義，引起國際間貿易摩擦，又話香港作為外向小經濟體，面對「波譎雲詭」嘅政經局勢，唔可以掉以輕心。睇怕波叔都已經畀特朗普嚇到騰騰震。
同出網誌播憂慮
但勢估唔到就連陳家強都同波叔口徑一致，同日出網誌話特朗普主張貿易保護同孤立主義，對華立場強硬，佢嘅政策出台將衝擊全球供應鏈，就連軍事、外交政策都會帶嚟地緣政治風險，香港唔可能獨善其身。
預告有政治波動
陳家強仲話特朗普係美國歷史上首位完全冇政府或政黨經驗嘅總統，冇任何政治包袱或誘因向中間靠攏，政策取向可以非常極端，預告香港嘅金融系統要居安思危，隨時準備好應付政治變化帶來嘅波動。
睇番惹火嘅特朗普上任都未夠半個月，第一個禮拜就已經先後簽署行政命令，將佢政綱中最具爭議性嘅政策付諸實行，包括退出跨太平洋戰略經濟夥伴關係協議（TPP）、喺同墨西哥接壤嘅邊境修建圍牆、禁止難民及七個穆斯林國家嘅民眾入境，甚至即時解僱拒絕為入境禁令辯護嘅司法部長等，最後仲搞到墨西哥總統取消原定嘅訪美行程。
雖然特朗普落實嘅咁多項行政命令仲未直接影響到香港，但已經令港府兩個最高位嘅財金官員喪膽，嚟緊「雙陳」仲有唔夠半年任期，睇怕佢哋都真係要醒醒定定嘞！