中環出更：樹根永續辦事處 張國鈞做「幫兇」
立法會前議員鍾樹根喺柴灣漁灣邨嘅辦事處份租約入面就喺上年臨換屆時就加咗黨友、現任議員黃定光嘅名，變相幫樹根「永續辦事處」。不過最近又多一個人做「幫兇」，續埋一份，嗰個人就係立法會港島區議員張國鈞（Horace）喇！
Horace話其實加名時都有認真考慮過，擔心又會好似之前咁畀人嘈，但見到當區區議員徐子見都有新辦事處，仲聽聞簽埋約，所以佢就決定加名喇！上屆立法會，民建聯（民記）喺港島區有兩個直選立法會議員，而今屆就得Horace一個，所以佢希望盡量請番晒啲職員，計一計數，估計佢係民記最多辦事處嘅地區直選議員，差唔多有成十三個。
顏汶羽老婆巧手宴傳媒
有咁多議辦，開支都相對大，佢話依家預計每年要倒貼四、五十萬元，好彩老婆都知佢鍾意做地區工作，所以都好支持佢。但可惜尋日佢喺鴨脷洲嘅首個立法會議員辦事處開幕時，因為老婆要照顧囡囡而缺席。
講起屋企人，民記觀塘區議員顏汶羽尋日就同老婆Joyce搞咗新春傳媒聚會，Joyce仲親自下廚，炮製咗拿手小食醉雞翼同牛。顏汶羽話平日成日都唔喺屋企食飯，不過Joyce仍然會自己一個人煮飯食。
卓妮