中環出更：兒時調皮 余漢坤難忘瞓米倉
農曆新年喜氣洋洋，新界鄉議局尋日喺沙田馬場舉行盃賽，一班城中名人都盛裝出席，洋溢濃厚嘅節日氣氛。講起新年，本身係離島區議會副主席兼大嶼山發展諮詢委員會委員嘅余漢坤就透露，自己喺大澳長大，細個嗰時爸爸喺大澳開舖，農曆新年只休初一至初三，非常勤力，又笑言最難忘係調皮時會畀爸爸罰喺米倉瞓一晚。
余漢坤話喺小學五年級之前一直住喺大澳，爸爸係一個嚴父，細個出街玩冇講低又或者玩到跌損手腳，就難逃被罰喺漆黑米倉過夜，瞓覺時一唔小心擘大口就會有飛曱甴飛入口，都咪話唔驚。佢又話有街坊指佢同媽媽好似樣，所以街坊一眼認得出，有街坊仲貼緊佢之前啲競選海報喺屋企添，所以佢覺得大澳鄰里間充滿人情味。而佢早前啱啱同太太，即係鄉議局前主席劉皇發（發叔）囡囡劉玉蓮等一行十人去完韓國旅行滑雪返港。
發叔囡囡劉麗華同劉麗芬亦有到場。劉麗華話團年飯由媽媽吳妹姝親自下廚，依家爸爸身體狀況還好，飲食仍以清淡為主，賀年食品就少食。見佢一頭秀髮及肩，佢話三姊妹細個嗰時完全唔似，反而大個咗之後愈來愈多人話佢哋好似樣，所以佢一直保持長髮，而姊妹劉麗芬同劉玉蓮目前就束短髮，冇咁易認錯。
史立德期待盛裝遊英
呢日現場相當熱鬧，馬主協會會長史立德同太太史顏景蓮、副會長陳湛文同孫騰章都有出席。馬主協會每年都會同成員揀一場特別嘅外國賽事參觀，史立德就話今年六月佢哋會去英國皇家雅士谷賽馬日，非常難得，陳湛文亦指當地賽事對衣着要求非常嚴謹，男士都要戴晒禮帽，女士更加唔使講一定着到最靚，好值得期待。
卓妮