非建制派多住新界
除咗政協，另外十七個同商界有關連嘅第一界別，近三百名選委當中，就有一百八十一個住喺港島，當中以地產及建造界同金融界最多，分別各有十五人或以上。
其實住喺新界區嘅選委仲多，有四百八十位。除咗漁農界同新界各區議會界別之外，最多人住喺新界嘅界別都係以非建制派為主，包括社福界、教育界、資訊科技界等。佢哋有好多仲住喺公共屋邨，例如資訊科技界選委、曾經參與立法會選舉嘅本土派陳澤滔同王百羽。
不過非建制派都有人住港島半山、大坑一帶，但人數明顯冇商界咁多，如法律界選委吳思諾同老公譚俊傑、公民黨主席梁家傑；而最有趣嘅係有選委報稱住喺服務式住宅，仲要唔止一個添！