政情：初一「穿頭」 莫乃光笑煮齋
立法會資訊科技界議員莫乃光（Charles）喺舊年舉行新春傳媒聚會時，炮製咗「燒烤風味」嘅玫瑰豉油雞。唔知係咪驚重複犯錯，佢喺今年嘅聚會就炮製做法相對容易嘅南乳齋菜，更指自己按食譜指示煮，做法「幾簡單」，將所有材料「炒埋一碟」就完成。咦！佢喺大年初一掛彩，係咪因為咁而要戒口，轉食齋呢？
Charles又再提及「穿頭」見紅一事，承認係因為睇手機而撞到樹枝，仲講笑話呢個係「IT界老毛病」，但佢最擔心嘅係穿頭會唔會影響髮線，好彩冇影響啫！
梁繼昌炮製清淡甜品
Charles同會計界議員梁繼昌（Kenneth）都話需要食清淡啲，而Kenneth就炮製相對清淡嘅朱古力同雲尼拿味嘅杯子蛋糕。仲記得舊年Kenneth屋企嘅焗爐曾發生小爆炸，搞到一地玻璃碎，佢就話焗爐已維修好，所以杯子蛋糕唔會有玻璃碎喎。