政情：容海恩揀男友 要睇變態戲
以立法會議員身份過首個農曆新年嘅容海恩（Eunice），尋日喺傳媒茶敍中自爆因為近期工作繁忙，到年初六仲未同家人食開年飯，好彩屋企體諒，接住嚟嘅周末先同家人「開年」。被問到拜年時有冇被「逼婚」，佢笑住話親友對呢個問題「已經問到唔敢再問」，但佢就拋出兩個擇偶條件，其一竟然係要鍾意睇「變態恐怖片」。
Eunice話男方嘅身高或職業並唔係考慮因素，最重要係「夾唔夾」，佢話自己好鍾意睇「變態恐怖片」，若果另一半可以陪佢睇就最理想。佢解釋，鍾意睇恐怖片係因為電影「夠變態」，平時亦會搜羅世界各地嘅恐怖片，研究點解可以拍到咁恐怖，有時仲會倒帶翻睇，睇吓拍攝時係咪用咗特技。
乘機宣傳禁毒訊息
佢又自爆曾因為某部恐怖片太「核突」，結果睇到嘔，所以平日只會喺睡房內睇戲，唔會要屋企人陪。佢話部分恐怖片情節喺歐美地區時有發生，有人更加會喺吸毒後虐待他人，包括用火燒他人嘅皮膚或者用針拮人眼睛，所以佢特別提醒青年人唔好吸毒，免造成悲劇。雞年新開始，祝佢快啲搵到個鍾意陪佢睇變態恐怖片嘅男朋友啦！