中環出更：徐詠琳拓飛鏢市場 連接世界
過年除咗喺屋企打牌，仲可以有乜嘢活動？香港品牌發展局（品牌局）早前舉辦「2016年品牌選舉頒獎典禮暨慶祝晚宴」嘉許本地傑出品牌，卓妮見到其中一間得獎公司係飛鏢工房，創辦人徐詠琳（Jennifer）就話，除咗買個鏢靶返屋企同朋友玩之外，仲可以透過網上對戰同海外嘅親友一齊玩，真係拉近距離，比齋寒暄傾偈互動得多。
其實香港有好多本地品牌質素非常高，除咗一啲默默陪伴大家成長嘅之外，仲有唔少新興嘅品牌一樣受歡迎。公司有份得獎嘅Jennifer就話最初做飛鏢生意時有朋友問起，香港得約一成人玩飛鏢，生意會唔會難做？佢就認為啱啱相反，事關其餘九成未玩過嘅人先係佢開拓嘅目標。加上飛鏢唔止本地人玩，佢有好多喺外國讀書時識嘅舊同學，依家都不時一齊對戰，加上佢哋家族嘅工廠本身做開五金製品，廠內嘅螺絲模具材料就正正係製造飛鏢嘅物料，另外仲研發出可調重嘅飛鏢，非常專業。
品牌局主席黃家和（Simon）就話香港有好多優質品牌，但全球經濟增長放緩，要面對各種挑戰，業界要奮力打逆境波嘞！提起過去曾經面對嘅逆境，Simon話試過一年之內冇咗六間食肆，因此深明唔可以將所有雞蛋放喺同一籃子內嘅道理，依家佢就以廠嘅業務為主，同時經營食肆同零售。
謝寶達渡難關靠朋友
另一間得獎公司鴻福堂集團主席謝寶達原來同Simon係結拜兄弟，謝寶達講起公司曾經經歷多個金融風暴，其中最誇張係多年前初嘗喺內地投資時人民幣貶值，令佢損失甚多，唔夠現金流，惟有周圍同人借，好在身邊老友多，所以話出外靠朋友真係好緊要喎。
卓妮