政情：侯志強開盤估特首 三人大熱

侯志強同立法會議員楊岳橋、張國鈞及自由黨陳浩濂等多名選委，尋日朝早出席一個電視節目錄影時點評幾名行政長官參選人。侯志強為多名參選人開出賠率，直指林鄭狀態大勇，衝到火紅火綠，「嘭嘭聲」蓄勢待發，所以林鄭嘅賠率最低，只有零點七；前財政司司長曾俊華（鬍鬚曾）就隱藏着「暗火」，呼籲大家「唔好睇小佢」，斷定佢屬次熱，賠率為一賠一；而葉劉淑儀亦係狀態大勇，準備工夫做到足，但賠率高於兩名前司長，達一賠一點五。佢又估計今次選舉有三個人能出閘，又話今次選舉「要有賠率」否則就要重賽，暗指若參選人最終未能取得逾六百票就要重選。

楊岳橋喺發言時就話自己冇張國鈞咁厲害，手上只有一張票「做唔到人哋競選辦要員」，只能喺選舉當中喺旁邊「望吓」，張國鈞隨即反駁，指即使泛民認為今次特首選舉係小圈子選舉，但泛民手中三百票仍可提名兩人入閘，直言「若你唔鍾意呢啲嘅，你咪提名過第二啲囉！」