政情：（先刂）雞用唱K神器 甩beat獻醜
近排「唱K神器」熱爆，民主黨（白鴿黨）立法會前議員單仲偕（（先刂）雞）亦緊貼潮流，尋日喺團拜入面拎咗支專業版嘅「唱K神器」出嚟，大唱經典名曲《Sound of Silence》，但佢本人嘅歌藝似乎「麻麻地」，一開始就唱到「甩晒beat（節拍）」兼「唔啱音」，就連佢太太都冇眼睇，惟有出場搭住老公膊頭一齊唱，喺太太甜蜜嘅支持下，佢終於勉強唱完一曲，真係一額汗。
嗰支專業版嘅「唱K神器」盛惠幾多錢呢？（先刂）雞都算精打細算，佢話喺鴨寮街格晒價先買嘅，三百幾蚊，唔會買貴咗，點知之後竟發現跌價，佢都有啲呻笨。
「愛妻號」過年後搵份全職
（先刂）雞出名係「愛妻號」，舊年卸任議員後就陪太太同囝囝到處去潛水、滑雪，就連早前選委會選舉期間都唔例外，一直玩到投票日前夕先返港。雖然放假去旅行寫意又令人羨慕，但當單太返回工作崗位之後，（先刂）雞就變得好清閒，得閒就去買下餸咁。佢坦言依家仲未想過退休生活，所以過完年後會積極搵一份全職工作，等太太三年後退休，先一齊環遊世界。