政情：漁民出海搵食 何俊賢難約開會
唔少行業過年都有自己嘅風俗習慣，立法會漁農界議員何俊賢（高佬賢）就透露，漁民過年時原來通常都唔喺香港，會趁早出海捕魚，仲要避免出海後即時叫佢哋返嚟，因為咁樣會唔吉利，所以約佢哋開會都要夾啱時間，唔係咁容易，好彩依家通訊發達，先可以維持溝通咋！
一般人喺農曆新年都會抖幾日同屋企團聚，但高佬賢話漁民食完團年飯就會趁早出海捕魚，可能會遠到去台山㗎，隨時初一、二就會走，因為早啲出去做嘢就會早啲搵多啲錢，所以過年通常都唔喺香港。
無魚獲折返唔吉利
如果有急事點算呢？佢話都可以打電話叫個漁民返嚟，但如果陸路返，就要成千蚊！揸船返嚟嘅話，計埋油費等等，更加要幾千蚊添！
再者，如果完全冇魚獲就叫佢返嚟，亦唔太吉利，所以新年流流，都唔會立亂叫啲漁民返嚟，有事就用電話同網絡聯絡。而漁民通常會到清明節先返嚟，自己要約漁民開會都要夾啱時間先得。