政情：吳得掂太弱雞 好難留低
今年七月政府換屆，到時新一任特首上場，將會人面全非。現屆政府嘅政治問責官員到底有邊個可以留低，又有邊個會被「叮走」？香港術數家協會術數師楊子東根據多名司、局長嘅出生年月日，為本報讀者分析批算司、局長各人嘅運程。外界一直認為人稱「吳得掂」嘅教育局局長吳克儉完咗今屆任期就冇得撈，而佢喺雞年運程可以用「不合格」去形容，至於可唔可以連任下屆政府，楊師傅話「狠啲嚟講係冇機會」，農曆六月更要特別注意健康，十一月有機會需要入院。
譚等到61歲行大運
吳得掂喺一九五二年出生，今年六十五歲，係己土命、忌金忌水。今年係丁酉年，金水旺，故對其不利，佢連任嘅機會非常之低：「狠啲嚟講係冇機會。農曆三月對吳克儉嚟講係唔吉利嘅一個月，七、八月更加係全年運程最差嘅月份。喺健康方面，農曆六月需小心注意，如果亂食嘢腸胃容易出事，十一月稍有不慎，更有機會入院。
特首梁振英宣布放棄連任後，曾經表示可能改變去留決定嘅政制及內地事務局局長譚志源，雞年嘅運程都可以用「不合格」嚟形容，無論點努力做嘢，都無法居功。而佢喺今年農曆三月開始運程轉差，五至八月都不利。一九六四年出生嘅佢今年五十三歲，要等到六十一歲至七十歲先「行大運」。莫非譚志源想更上一層樓，就要休息一屆，留待再下一屆政府先發功？
至於剛「升官」做財政司司長嘅陳茂波（波叔）係一九五五年三月出生，雞年運程則平平無奇，僅算做合格。但因為佢本人「行緊大運」，加上「個相格幫咗佢」，面部四四方方，「做財爺個相好稱職」。波叔喺農曆五、六月將大旺，料會有「好橋」幫港人，但喺農曆十月健康會較差，不宜太操勞。楊師傅又指波叔八字結構特殊，「唔會去到最高點，亦唔會跌落谷底，永遠都係喺中位浮浮沉沉」。
高永文九月中要慎言
食物及衞生局局長高永文、商務及經濟發展局局長蘇錦樑都有機會過渡至下屆政府。一九五七年出生嘅高永文喺農曆三月將有貴人相助，但五月運程全年最差，健康易出問題，要避免去熱嘅地方，九月則說話要小心，以免被斷章取義。至於一九五九年出生嘅蘇錦樑雞年係險中求勝，唔一定係靠自己，但會有貴人提攜。