中環出更：暴食糖蓮藕 容海恩過肥年
農曆新年，到處喜氣洋洋。童心未泯嘅立法會議員容海恩見到傳統舞獅，立刻笑逐顏開，拉住舞獅影個不停，兼自爆新年期間最愛食糖蓮藕，由於食得太多，所以每次過完年首要做嘅事就係去減肥。
糖蓮藕係傳統賀年食品，由糖霜醃製蓮藕而成，寓意「年年都有」，係新年全盒嘅指定糖果之一，但近年已愈嚟愈少見。容海恩尋日出席由西貢民間文化主辦嘅新春活動時，透露糖蓮藕係佢嘅新年至愛，每次去親戚屋企拜年，除咗(手豆)利是最開心之外，第二個目標就係糖蓮藕，見到就忍唔住放入口，仲食唔停添，所以每年過完「肥年」後，立刻要努力減肥。
EQ情迷傳統舞獅步法
同場另一立法會議員葛珮帆（EQ）嘅最愛唔係糖果利是，而係傳統舞獅。EQ話由細到大睇舞獅都好入神，覺得舞獅嘅師傅步法好勁，舞起上嚟獅子栩栩如生，搞到佢曾經心郁郁想加入拜師學藝。不過，舞獅包含武術，同EQ格格不入，所以佢最後未有學「武」，反而學「舞」，仲自問舞功有番咁上下添！
講起舞獅，又點少得舞麒麟。呢項相傳源自廣東省或客家嘅民間技藝，主角係代表國泰民安嘅麒麟，西貢區區議員方國珊更加主動同麒麟合照，又話麒麟係瑞獸，所以唔驚畀麒麟撞喎。
另外，同場的新界鄉議局主席劉業強亦透露，自己喺十歲之前曾經習武，話當年喺天台練功，淨係紮馬都練咗成年。佢覺得自己一家有習武天分，無論係中國武術大聖劈掛抑或係韓國嘅跆拳道都得，只可惜佢之後為咗學業而出國留學，被迫放棄習武，又話假如佢繼續操練，一定學「武」所成。
卓妮