勞方拒接受合約工時
【本報訊】標準工時委員會報告只提出建議立法規管合約工時及加班補水方案，標時立法經過逾三年勞資拉鋸仍「得個吉」，勞工顧問委員會僱員代表鄧家彪昨出席一個論壇節目時，多次重申勞工界不會接受合約工時方案，質疑僱主只要將合約工時拉長，便可走法律罅毋須補水，變相將長工時合理化，打工仔遭受剝削的慘況仍無日無之。
標時委員會主席梁智鴻解釋，經過勞資雙方溝通，認為合約工時及加班補水方案在目前較為可行，至於標時立法，可待兩年後的檢討階段再研究。不過，報告建議的合約工時僅涵蓋低工資員工，但卻沒有為低工資水平劃線，梁智鴻再次將責任歸咎於勞方退出談判桌，「咁多次開會問勞工界點樣劃線，無人畀到條線我。」
鄧家彪反駁指，合約工時並非他們初衷，討論下去無疑是走錯方向兼浪費時間，勞方才退出。他又指，合約工時的工資水平劃線並非無現存框架可參考，「你用現行嘅最低工資去計，即最低月薪係一萬三千三百元，低過呢個數嘅僱主就要做工時紀錄備存，其實呢個做法同合約工時無乜分別。」
飲食業界反對標時立法
同場的香港餐飲聯業協會會長黃家和承認飲食業界工時較長，但反對標時立法，認為各行業各有特色，一刀切的做法運作有困難。他又反對鄧家彪指新方案變相允許僱主拉長合約工時的說法，「合約是僱主僱員雙方去傾，唔可能僱主講乜，僱員就會接受，有啲員工講明六點要收工，補水都唔加班，僱主都無佢符。」他又大呻洗碗工及前線員工已長期面對難請人。