海味舖開年飯 老闆嘆未來茫然

市道疲弱 不復十多年前光景

裕隆號自一九六七年開始每年大年初二吃開年飯的傳統，昨筵開兩席，寓意發財好市的髮菜蠔豉、代表生財的冬菇生菜、撈到筍嘢的筍蝦碌等八道餸，近半世紀不變，轉變的是老闆吳偉鴻的心態。他說，以前農曆新年專心與父母團年、開年，單是夥計便湊滿四枱，如今變了自己揸莊，卻沒有了夥計蹤影，「佢哋去晒旅行」，只有家人齊吃開年飯，「仔女遲啲有家室，都可能未必嚟」。他慨嘆，賣海味工時長，無年假，新入行的人愈來愈少，他曾問兒子「返唔返嚟幫爸爸手」，未得到回應。吳老闆說會堅持做落去，「後生想通就想通，佢哋個心唔想做，都一定做得唔好。」

吳透露，去年生意有少少增長，不過不復十多年前光景，主要因整體市道消費力弱。幸好西營盤港鐵站落成，交通便利，令他們做多一成生意，展望新一年更好景。

街市人山人海 市民盼食得豐富

另外，九龍城街市昨早人山人海，雞販玲姐說年初二開工大吉，雞價只比平日略為加價一成，零售價由每斤七十九元加價至九十元，不少熟客已提早年三十預訂，更多數買兩隻或以上，「今年好有氣氛，好多人買活雞拜年，食雞過年喜氣洋洋，身壯力健呀！」有海鮮檔主亦喜上眉梢說，生意額比平時多一成至兩成，最受歡迎是東星斑及蝦，不少客人花費近三千元，出手闊綽。市民何太透露，花費一千元買海參、活雞等新鮮食材，希望一家人開年食得豐富少少。