政情：白鴿黨員fb留言爆內訌
一向四分五裂嘅民主黨（白鴿黨），近日再爆內訌！該黨沙田區議員丁仕元（圖）之前喺facebook（fb）群組留言，話該黨議員林卓廷及區議員鄭則文係「表面清廉」，又話有人要扣佢分裂白鴿黨嘅帽子。林卓廷就呢段留言發公開信畀丁仕元，要求收回言論，否則會向該黨紀律委員會（紀委會）作嚴正投訴。因為一段小小留言就搞到要發公開信，仲要向紀委會投訴，會唔會小事化大呀！
據了解，丁仕元同林卓廷早前已因地區問題結怨，丁仕元仲試過向中委會投訴林卓廷。日前，丁仕元就喺一地區fb專頁上貼文，指自己「在區內與貪污顧問開戰，竟被人扣分裂民主黨的帽子」，當被市民問到邊個扣帽子時，丁就留言話問「表面清廉的鄭則文及林卓廷」。
或轉交紀委會處理
就係因為咁，林卓廷向丁仕元發公開信。林卓廷形容丁係發放「誹謗訊息」，希望丁澄清為何有「表面清廉」嘅指控，要佢收回言論，否則會向紀委會投訴，更唔排除採取其他行動以維護聲譽。其實白鴿黨新界東支部一向問題多多，勢估唔到一個fb留言，竟然要用到公開信處理，仲可能轉交紀委會處理，睇嚟呢個心結都難以短時間內處理。
_