中環出更：橫額寫錯名 陳克勤賴運程
早幾日都講過，民建聯（民記）嘅陳克勤（克勤，圖）被揭發賀年橫額寫錯自己個名為陳克「勸」，遭外界嘲諷。克勤日前就化身堪輿學家「民師傅」為自己平反，話橫額出事當日（二十四日）係年廿七，係屬龍嘅佢喺猴年最黑嘅一日，牙痛、被車撞、橫額寫錯名同失眠一Take過，似乎係將橫額錯名嘅責任推卸係運程所致喎。
化身「民師傅」解畫
克勤喺facebook上載咗一幅圖，圖係佢本人分身飾演嘅民師傅，指年廿七當日朋友「陳先生」一過凌晨十二點就開始牙痛，痛到失眠結果只係瞓得三粒鐘，之後趕去立法會開會四個鐘，先可以搵醫生剝牙；其後陳先生揸車期間又無辜被撞，慶幸人無受傷。
而當日最黑仔嘅，自然係陳先生嘅橫額寫錯自己個名，但民師傅就話出錯涉及運勢，屬「無妄之災」。講白啲，即係將出錯責任歸咎係運程囉！最後，民師傅相當樂觀，認為陳先生喺新嘅一年會「否極泰來」，雞年行大運添！
卓妮
_