阿健在一間印刷廠擔任印刷技工，工作時，他經常接觸油墨及各種顏料，並慣常以白電油清除手上污漬。某天，他的雙手開始發紅及感到痕癢，並且出現腫脹和水泡，於是到職業健康診所求醫。醫生了解阿健的工作習慣及仔細檢查他雙手後說：「你對手開始甩皮、而且皮膚開始裂開同埋出血，證實係患上『職業性接觸皮膚炎』。發炎主要原因係由於工作時冇穿戴任何合適手套，令皮膚直接接觸化學品而引起。」
阿健問：「咁嚴重？都係我平時貪方便，覺得戴手套麻煩。污糟就搵電油抹一抹，點知原來化學嘢會搞到發炎。」
醫生點頭道：「每次使用化學品前要睇清楚標籤，並採取建議嘅預防措施。當然仲要佩戴合適及認可嘅手套。其實，日常工作環境中，仲有好多其他潛在危害會引致職業病。根據《職業安全及健康條例》，須予呈報職業病共有五十一種，當中有由物理因素、生物因素、化學因素及其他因素引致。勞工處最新統計數字顯示，二○一五年經證實為職業病個案總數二百五十六宗，佔最多嘅頭三種係職業性失聰、矽肺病及手部或前臂腱鞘炎，分別各佔一百三十三、五十六及三十一宗。」
阿健說：「原來工作環境有咁多危害？真係好得人驚。」
醫生回答說：「咁你又唔使咁擔心。只要僱主為員工提供安全健康嘅工作環境，而僱員亦注意及遵守安全及健康措施，患上職業病嘅機會自然大大降低。」
職業安全健康局
www.oshc.org.hk