全港性系統評估（TSA）去年在家長、學生和多數學校反對下，被迫擱置；然而，教育局擬將其改名為基本能力評估研究計劃（BCA），回歸全港小學；擺明係改個名翻兜。吳得掂否認係「借屍回魂」，強調係「擴大研究」，並非復考。
香港教育政策朝令夕改，令師生及家長無所適從已是不爭的事實，如今，TSA才被喝停，歲晚流流，吳得掂又急於整壇BCA獻世！佢賣花讚花香，話改良版小三TSA已優化試卷又新增好多新元素，有信心移除過度操練誘因。
吳得掂教育局局長，你以為改個名加啲「新元素」就可令BCA好味啲，你估啲新元素係味精咩？一加落去，學生就會愉快應考？所謂「擴大研究」，學生一樣係做白老鼠，一樣要考試被評估，學校一樣有壓力，官校唔買TSA練習，唔代表其他學校啲老師唔自製「練習」。講真，你又提唔出具體方案如何監察學校過度操練，又話學校唔參加就要「解釋」，咁即係借研究之名，叫學生繼續受無形壓力！咁係乜鬼優化啫？教育局與其花費咁多資源去推行BCA，不如多做實事，譬如擴大研究一些學校何以成績上不去，師生有甚麼真正困難，當局如何支援佢哋，不是更切實可行嗎？
有家長聯盟發言人指，未見吳克儉所指TSA有助改善教學質素的實證，呼籲罷考。網上群組亦紛紛發炮，有呼籲學生集體請病假、卷上不寫名甚至罷考。看來，教育局「擴大研究」，家長卻「擴大對抗」。教局與其搞咁多唔得掂政策，倒不如學吓hea住做嘅前財爺話齋：與民休息，學吓老莊無為之治。香港教育要有得救，老朽認為吳得掂下台後還有一線希望，因為教育的得在軟件而非硬件，今花在教育的錢多卻冤枉，一切政策重包裝，以為花巧好睇卻惹來天怒人怨，正是：只恐人才凋落甚，浪擲金錢改錯名；TSA後BCA，未曾回魂要招領。