政情：林鄭鬍鬚曾撬人 民主思路星散

前政務司司長林鄭月娥同前財政司司長曾俊華（鬍鬚曾）早前相繼宣布辭職參選下屆特首。其中林鄭月娥嘅競選辦公室入面，包括民主思路理事李律仁，同埋召集人之一嘅劉培榮；事隔幾日，原來民主思路總幹事袁彌昌同埋唯一研究員忻浚賢，亦都加入咗鬍鬚曾嘅競選辦公室。民主思路召集人湯家驊尋日就喺fb大呻，民主思路已經被兩個競選辦公室撬走多個人才，自稱係最大受害者，形容要咬緊牙關。

麥嘉晉認受邀 考慮中

據了解，民主思路目前只走剩一個全職員工，而除咗正式員工之外，鬍鬚曾競選辦公室亦曾向曾經代表民主思路參選立法會嘅麥嘉晉同黃梓謙埋手，冀兩人嘅參選經驗及健康中產形象可有助選情，並協助鬍鬚曾落區接觸街坊。麥嘉晉接受查詢時承認有收過邀請，目前仍在考慮當中，稍後與民主思路其他理事商討後，再作決定，但佢強調倘若加入亦只會以義工身份協助。