政情：李國章被工會捉痛腳 鬧人蠢無藥醫

是非不斷 被要求下台

李國章自上任之來已經非常惹火，佢曾經斥學生會前會長馮敬恩係「大話精」，又話衝擊校委會嘅學生，其行為如同「吸毒」，港大有唔少人都對佢管理手法有微言。港大教師及職員會會長張星煒日前就去信李國章，要求佢檢討自己過去一年出任校委會主席嘅表現，更力數李國章嘅兩個問題，包括未有在半年之內為港大訂下一個新方向，同埋未有如期喺去年十月發表有關大學管治嘅報告，一拖再拖。張星煒喺信中話，李國章未有兌現承諾，要求佢承認自己係「大話精」，同埋佢要為自己嘅表現引咎下台。

張星煒遭諷 迅速反擊

比起之前幾個月都唔回信，李國章今次就迅速好多，喺兩個多小時後已經簡短回覆，話自己無奈唔能夠將智慧同理性，教導畀思想和心胸狹隘嘅人，更加暗諷張星煒係「人蠢無藥醫」，至於落台一事，當然係提都無提喇！張星煒之後回信反駁李國章，再次要求李承認自己係「大話精」，仲話既然李國章認為自己已經係「無藥醫」，不如為港大嘅發展辭任校委會主席喇！

另外，學生會會長孫曉嵐早前亦就同一議題去信李國章，李國章尋日就回信話，係唔係要專責小組喺未完成嘅情況下交報告，直言一份只係半生不熟嘅報告係無意義。

適逢特首選舉，身兼教育界選委嘅張星煒接受查詢時就話，工會一直關注港大學術自由同院校自主嘅情況，佢哋已就此約見各特首參選人，並表達港大學生同教職員對李國章嘅不滿，促參選人若當選就要考慮罷免李國章。

港大嘅風波浪接浪，面對學生同教職員嘅反對，李國章似乎都舉步維艱，就姑且睇吓沙皇可以點樣將港大撥亂反正喇！