政情：房委會「成」「人」鬥瞓
立法會議員喺開會期間瞓覺已成常態，但呢個常態最近就蔓延到房屋委員會（房委會）。房委會尋日下晝召開例會，作為委員嘅立法會前議員黃成智同現任議員張宇人均被睡魔急Call，喺會議上瞓着咗，黃成智仲誇張到攤喺張櫈度瞓到「口擘擘」。
話說房委會喺下晝兩點開始，由運輸及房屋局局長張炳良先作簡介，而黃成智竟然遲到，喺簡介完結後先到場。除咗遲到之外，房屋署官員喺會議上解釋來年度機構計劃期間，黃成智公然瞓到「口擘擘」，歷時長達十分鐘，在場嘅官員同旁聽人士都睇得好清楚。雖然佢喺十分鐘後醒番，但接下來嘅時間亦多次閉目養神，唔通佢最近公事繁忙？
至於張宇人，尋日朝早出席立法會特首答問大會時精神奕奕，但下晝喺房委會會議期間，突然低下頭，面向桌上嘅電腦螢幕同會議文件，咪以為佢努力準備資料，仔細睇先發現佢原來合埋眼，耷低頭瞓覺。