政情：吳傑莊搞講座 名人遊戲吸「青」
近年唔少組織都爭相舉辦青年活動，想突圍而出一定要多花心思。香港青年聯會日前就計劃喺二月十日舉辦一個大型論壇，除咗搵嚟甚少出席呢類活動嘅著名籃球運動員姚明擔任演講嘉賓外，青聯主席吳傑莊仲話會有別於一般坐定定聽到瞌眼瞓嘅論壇，會加入多好多互動遊戲環節，等大家唔使齋聽喎。
邀得姚明分享故事
其實青聯之前已舉辦過類似論壇邀請藝人謝霆鋒及阿里巴巴主席馬雲擔任嘉賓，吸引大量年輕人報名，原定千幾個名額爆滿，最後成八千幾人要轉場去亞博舉行。副主席楊全盛同錢國強就話，今次佢哋二月嘅賽馬會夢想衝線計劃之《伴你啟航，創業導航》大型論壇都係以創業為主題，但除咗邀請資訊科技界巨子參與，仲搵埋姚明分享佢哋嘅個人故事，表面上好似同創業冇乜關聯，但原來姚明除咗打籃球勁，亦都好有生意頭腦，投資大部分賺錢，加上兩個來自唔同界別嘅人更容易擦出火花，屆時仲會有神秘嘉賓，總之一定唔會悶咁話。
吳傑莊仲話依家已經可以上網報名，三千五百個名額已有千幾個報咗名，但上次反應太好，今次會預備埋網上直播，等冇位嘅都可以上網睇。