政情：高官加薪被拖陳健波謀剪布

問責官員加薪撥款申請早喺一月六日遞交財委會審議，民主派議員除咗唔認同問責官員值得加人工之外，仲不滿政府唔尊重政制事務委員會嘅決定，硬將委員會已否決嘅建議交上財委會處理而發動拉布，連過去極少參與拉布嘅議員，亦話要用盡一切方法阻止建議通過。喺民主派提出中止待續、休會辯論議案同呈交大量修訂之下，會議進度停滯不前。

政府企硬 冇打算撤方案

面對民主派強烈嘅反彈，政府並冇打算好似之前咁撤回議案，有建制派消息話政府認為之前退讓得太緊要，所以今次退無可退，又覺得官員已經十四年冇加人工，今次撥款申請係合情合理。好似民主黨（白鴿黨）議員許智峯就表明唔會因加會而唔拉布，佢話已預備幾十條冇經預告嘅修訂，而其他民主派亦會用盡十五分鐘發言時間，一直同政府拉鋸落去，佢又話民主派一定唔畀佢輕易通過撥款，佢個人更唔排除行動式嘅抗爭添！

由於兩邊都唔退讓，呢個燙手山芋就交番落陳健波手中。據了解，陳健波日前率先諮詢建制派議員，要求喺二月中嘅其中一個星期六加開財委會，並一連加足四節，合共八小時，即係開足全日，以處理滯後嘅議程，雖然班建制派議員都不情不願，但為抗拉布亦別無他法。除咗加會，據聞陳健波仲會喺今日嘅財委會正式劃線剪布，提出限制議員發言時間。

問責官員表現差阻力大

話時話，如果現屆政府嘅問責官員表現好啲，民情上或者會有更多市民支持加薪，到時民主派拉布嘅聲勢都會細好多，家陣個政府做成咁，唔加會同剪布都幾難可以成功加薪。