中環出更：伍月柳畫展撐場 孫秉樞難忘牽手出嫁
嶺南畫派大師趙少昂入室弟子、嶺藝會會長伍月柳早前聯同幾位高徒舉行畫展，香港鐘表業總會永遠名譽主席孫秉樞一早就到場，咁畀面，除咗因為伍月柳係佢太太嘅姨甥女之外，仲爆料話當年係佢拖住伍月柳嘅手出嫁添！
孫秉樞笑笑口咁話，當年佢做東華三院主席嘅時候，伍月柳係東華旗下廣華醫院嘅高級護士，後來伍月柳同丈夫趙榮裕醫生結婚時，孫秉樞仲扮演父親嘅角色，拖住伍嘅手出嫁，有咁深嘅淵源，難怪佢咁瞓身支持畫展喇！
現場展出唔少靚字畫，卓妮見立法會文化界議員馬逢國好認真咁駐足觀賞，唔知佢寫字或畫畫叻唔叻呢？佢就自嘲寫字好論盡，因為佢做影視出身，度橋就得；又形容當日見到咁多靚書法，覺得自慚形穢，揚言退休後要重新學寫書法喎。
賴玉蓮滿場飛助師
轉頭見到理工大學校長唐偉章、中文大學副校長霍泰輝都有到場，因為伍月柳經常帶理大同城大學生到內地寫生、舉辦畫展講座。伍嘅弟子由三歲至八十歲都有，連孫仔、孫女都係佢徒弟。當日佢嘅四歲外孫兼徒弟陳正行都喺展場「幫手」，小豆丁夠晒趣致，令現場氣氛輕鬆唔少。
嶺藝會主席賴玉蓮亦忙到滿場飛，佢自從七年前跟伍學畫之後，就幾乎日日同師傅一齊，兩人情同母女，見面時間比自己家人仲多添！卓妮見賴玉蓮都有書法參展，唔知佢鍾意畫畫或書法多啲呢？賴玉蓮笑稱作畫嘅人最終要寫字，所以練埋書法，但始終鍾意畫畫多啲。
卓妮