政情：工聯會示威何啟明撩交嗌
特首梁振英（CY）尋日發表任內最後一份施政報告，立法會示威區一如以往有唔同政黨針對CY嘅示威活動，但民協副主席何啟明喺示威區就反而狙擊同場嘅工聯會，批評佢哋出賣工人，又指佢哋應該叫「工賊會」而唔係「工聯會」。莫非何啟明為立法會補選熱身？
工聯會尋日朝早喺示威區示威，要求CY就多項民生議題兌現承諾。何啟明喺工聯會眾人開始嗌口號後冇耐，大鬧工聯會「你知唔知醜（口架）？」又點名批評立法會議員梁美芬，指佢反對標準工時，同工聯會嘅理念相反，但工聯會仍然支持佢。何啟明又批評工聯會為咗選票而放棄原則，「阿爺吹雞工聯會即跪低」。
黃國健批民協只做政治攻擊
面對有關指摘，工聯會立法會議員黃國健到場接請願信時，批評民協唔係為市民爭取權益，只係做政治攻擊，認為咁做係民協快將亡黨嘅警號，希望民協能夠反省。
盛傳何啟明係參選立法會九龍西補選嘅人選之一，而工聯會亦打算由立法會前議員王國興出戰補選，依家兩黨喺示威區對罵，未知係咪提早開戰呢？