政情：孫秉樞：鐘錶業重心回歸本地客

香港零售業經常將生意淡靜歸咎於訪港內地客大減，但政府公布嘅最新數字顯示，上個月訪港內地旅客增長逾百分之六，反映咗內地客來港豪買嘅消費態度有變。「鐘錶大王」、香港鐘表業總會永遠名譽會長孫秉樞都話，以前內地客郁親就半打、半打咁買名錶嘅盛況已經過去，業界惟有將心機擺番喺本地客身上。

孫秉樞嘅公司位於尖東，佢話近排的確見到街頭多咗遊客，不過佢哋買嘢嘅心態已經唔同咗。尤其係貴價嘅鐘錶零售店，昔日豪買嘅情況已不復見。估計同港元升值有關，令到內地客嘅購買欲減低。

佢話業界應對之道係重整舖位同分店網絡。

佢講笑話，以前如果業界捱唔到貴租而撤出黃金旺區，公司股價即刻下跌，依家就啱啱相反，可見大家心態都以穩健為重。此外，將消費對象重新放喺本地客身上，亦係令生意回歸正常軌道嘅辦法之一。