政情：補選亂插旗 泛民鬥狼死
青年新政游蕙禎同梁頌恆因宣誓風波而被法庭裁定取消議員資格，雖然佢哋表明會入稟上訴至終審法院，但九龍西同新界東嘅補選似乎勢在必行。民主動力上星期已就補選舉行協調會議，據聞，民主黨（白鴿黨）同埋喺舊年九月選舉中失利嘅工黨都非常狼胎，就算未決定出選嘅人，都話兩區都要選，而同樣係無人出選嘅公民黨（公文袋），都舉手話要選九龍西，完全係生人霸死地，唔畀機會新民主同盟同民協等政黨借補選翻盤。
有政黨謀藉機翻盤
民主動力日前舉行協調會議，討論未來選舉安排。據了解，會議上討論咗各政黨喺地區發展嘅協調，同時亦就未來嘅補選初步表達意見。會議上，除咗喺選舉全軍盡墨嘅新民主同盟范國威同民協馮檢基有意借補選翻盤，分別表明有意選新界東同九龍西之外，由胡志偉做主席嘅白鴿黨、楊岳橋做黨魁嘅公文袋同舊年喺新界西連任失敗嘅李卓人所屬嘅工黨，都喺部分選區暫未有人選之下，已經報名話選。
有與會者透露，白鴿黨自以為大把區議員，喺新界東支持度又足夠，所以就算未有黨員表示有意，都要霸定個位先。亦有人大鬧部分政黨係獅子開大口，無人無資源，完全唔明點選。但佢哋喺會上仍然同意舉行初選，以免因為太多泛民候選人而令建制派候選人有機可乘。
眾志加入協調機制
民主動力召集人趙家賢接受查詢時承認曾經開會討論選舉問題，佢話與會者原則上同意初選，認為初選的範圍應擴大至非建制派，至於細節將喺下次討論。而另一方面，會上討論咗各政黨喺地區發展嘅協調，以及區議會選舉嘅初步規劃，而香港眾志亦已加入協調機制。
不過，各大政黨過去幾次選舉都曾經主張協調，好似舊年九月立法會選舉，泛民曾就超級區議會議席討論初選，最後都係因為個別政黨反口唔參加而失敗收場，所以唔少人對初選其實不存希望囉！