中環出更:薪金加幅小 區議員「一肚氣」

加薪係對打工仔過去一年辛勞工作嘅鼓勵,但加幅過小確實會令人大失所望,從而影響士氣。區議員嘅薪酬今年雖然有所增加,但就怨聲四起,因為薪金加幅不足百分之一點二,只得三百六十元,平均每月營運開支亦增加不足五百元,所以有區議員狠批呢次決定係侮辱。嘩!好火喎。

劉國勳指難抵加租

區議員嘅薪酬係依據甲類消費物價指數調整,根據政府統計處資料,舊年十一月嘅指數比前年同期增加百分之一點二,而截至十一月為止,過去十二個月嘅平均增幅為百分之三,所以有區議員認為政府有需要解釋理據。

有區議員話加薪幅度過低令其大失預算,加上見到公務員舊年加薪百分之四,而問責官員亦正喺立法會中尋求加薪逾百分之十二,喺有對比下更為憤怒。

代表區議會嘅立法會議員劉國勳直言對呢次加薪決定「一肚氣」,佢亦已去信民政事務局局長劉江華,亦會發起聯署反映意見,更打算喺立法會中提出質詢跟進。佢又透露,現時普遍租金增加,即使是房署單位亦要加租,認為營運開支嘅加幅並唔足夠,係令區議員最不滿嘅地方。

中西區區議員蕭嘉怡喺私樓區開設辦事處,佢話租金本身就高,若果再加租就會百上加斤。講到貼錢,佢喺舊年亦喺租金同其他使費方面補貼咗五位數字。劉國勳又話過往已有唔少區議員要貼錢工作,相信未來一年情況更普遍,擔心會影響地區服務,亦會令人才流失。

卓妮

第一手消息請下載on.cc東網iPhone/iPad/Android/Windows Phone Apps