中環出更：議員打針麥美娟怕痛大嗌
署理食物及衞生局局長陳肇始尋日朝早領軍到立法會，為議員們接種流感疫苗。有議員一開始就問陳肇始會唔會親自操刀幫佢哋打針，佢就笑住話自己係「生手」，又話班護士「手勢好啲」，專業過自己，所以成朝都冇落過手，淨係留喺護士旁邊協助。雖然局長話護士嘅手勢幾好，但對麥美娟（Alice）嚟講完全冇作用，支針一拮落去，佢就痛到擘大口大嗌。
尋日朝早班議員排住隊等打針，輪到Alice嗰陣，佢一坐低就已經大爆自己連捐血都會暈低，勁驚要打針！陳肇始見狀就即刻走埋去安慰佢啦，點知護士支針一拮落去Alice度，佢就即刻痛到擘大口大嗌，嗌到在場個個聽到。當時佢面容扭曲、狀甚痛苦，連立法會秘書處同食衞局嘅官員都忍唔住笑咗出聲呀！
梁君彥「偷步」接種
大家可能太專注Alice個痛苦樣，忽略佢剪咗新髮型，原來佢之前個髮型畀人話過佢「惡死」，所以專登剪番個感覺隨和啲嘅頭，早兩日仲畀記者讚佢cute添！
兩名男議員田北辰（田二少）同何君堯打針之前就行埋一邊除低外衣，除到得番件「阿伯底衫」。田二少更露出好似有咗三個幾月嘅大肚腩，就喺傳媒鏡頭前準備接種疫苗，陳肇始主動上前幫田二少摺起衫袖，之後由護士為佢打針。田二少盛讚護士手勢好，仲笑住咁話：「冇高永文舊年咁痛」添！
立法會主席梁君彥感謝局方安排，仲講笑咁話因為局長高永文遲遲都未回覆安排，所以佢早已打咗針，最後要黨友林健鋒做第一個打針嘅議員。陳肇始亦感謝議員支持，又呼籲佢哋喺地區多啲宣傳，令兒童、孕婦同長者等高危人士都可以及早接種咁話。
卓妮