政情：張建宗偷雞「彪」走拒孭鑊

「唔覺得可以向前行得到」

新一屆勞僱會嘅僱員代表喺舊年十一月選出，任期由今個月開始，為期兩年，今屆僱員代表包括阿Bill、陳耀光、王少嫺、周小松同劉玉輝，其中阿Bill同劉玉輝都係新當選嘅委員。阿Bill透露，佢哋喺舊年十二月底收到信件通知，話標委會嘅任期早前延長至今個月底，成員組織則維持不變，其中包括勞顧會身份出任標委會當然成員嘅安排，即係五名僱員代表突然「被加入」成為標委會成員之一。咁都有得靜靜雞夾硬嚟，真係睇少眼都中伏！

阿Bill話對於咁嘅做法覺得好訝異，唔明白點解標委會咁不心息，要邀請新一屆嘅僱員代表加入，僱員代表已將報告同建議交咗畀特首，唔覺得標委會就標準工時可以向前行得到，認為自己嘅意見已經畀咗，但係又冇新進展，「好意思叫我返去嘅？」

若未為意 報告加名中伏

佢又提到張建宗早前講過，施政報告會就退休保障及強積金對沖有方案，但係就冇提到標時，佢估計，施政報告就標時唔會有僱員理想嘅方案，如果自己唔為意，標時報告就可能會寫咗佢個名上去，即係要佢「孭黑鑊」，所以佢同其他僱員代表將會喺施政報告發表之前，再次退出標委會。

講真嗰句，標委會任期就快結束，咁樣都可以夾硬嚟，當局想做乜，真係「司馬昭之心，路人皆知」，政府成日以為程序上過到關，件事就可以算數，其實咁多時間諗埋啲小把戲，不如老老實實，聽吓市民嘅意見，先至係真正為民做事！