中環出更：港府護樹失策 各界斥責
繼早兩年半山堅道有古樹因感染俗稱「樹癌」嘅褐根病被移除後，近日該處附近又有樹木受感染，或有機會波及更大範圍甚至途經嘅人同車。卓妮尋日喺沙田馬場見到潮州商會副會長鄭敬凱，講起佢公司最近喺四川一個景區有旅遊項目，視察時對當地管理樹木嘅方式印象好深，有醫生專門照顧同醫治一啲有病嘅樹，部分更係千年老樹添！
講起香港嘅古樹斬一棵少一棵，鄭敬凱話相信好多時都係冇辦法之下先咁做，皆因本地呢方面人才唔足夠，而香港嘅教育風氣傾向令多數學生選讀工商管理或金融等科目，冇乜幾多個會諗住讀地理，更莫講樹木工程呢啲咁冷門嘅科目，所以想搵人醫吓棵樹都唔係咁易，加上可能擔心樹木倒塌會影響行人安全，有時焗住索性斬咗棵樹一了百了。佢話香港有唔少珍貴靚樹，市民亦好愛護珍惜，佢都有喺家中種植，有時仲會善用鋸出嚟嘅木材做燒烤用嘅炭。
林建康嘆路旁樹鋪塵
轉頭見到愛沙尼亞共和國駐港名譽領事林建康同太太林黃寧艷，以及太子珠寶鐘錶主席鄧鉅明同太太鄧宣宏雁。林建康認為香港喺管理樹木方面有改善空間，好似新加坡及歐洲樹木管理方面就做得唔錯，而香港雖然有唔少樹，但照顧方式唔夠細心，好似馬路旁邊嘅樹經常鋪晒塵，顏色灰灰哋咁。
鄧鉅明就認為駕駛者好難留意同評估路旁樹木有冇倒塌危機，要靠相關專業人士處理，認為如果「樹醫生」簽字列明邊啲樹健康或有病，可加快處理相關問題，亦增加多一份對樹的責任感。
卓妮