政情：今日你上鏡：滿腹大計 陳樹德不言退

一盤生意如果做得成功，吸引投資者收購係好自然嘅事，好多人梗係趁機賣個好價錢袋袋平安。不過「美容教母」CMM蒙妮坦國際集團創辦人鄭明明（明明姐）嘅丈夫陳樹德就唔係咁諗。早前喺一個活動上見到佢哋兩夫婦，明明姐笑笑口話，丈夫做環保生意，有人同佢提出收購都唔肯賣，因為佢唔肯退休喎！八十幾歲嘅陳樹德就興致勃勃話，佢依家做埋農業，仲進軍「一帶一路」沿線國家添！見佢講發展農業嘅滿腹大計講到停唔到口，明顯係永不言退喇！