政情：補選圖搵活路 救黨恐變掘墓
青年新政游蕙禎同梁頌恆現正周圍撲水，以便就高院取消兩人議員資格嘅裁決進行終審上訴，立法會九龍西同新界東選區到底需否及幾時進行補選，依家仲係未知之數。不過，喺去年九月立法會選舉中落敗嘅民協馮檢基及新同盟范國威，經已明示暗示會分別出戰九西同新東補選，希望為自己及一手創立嘅政黨翻盤。但有泛民中人分析，民協與新同盟現正面對內憂外患，兩人強行出選只會令問題加劇，隨時變成自掘墳墓，加速兩黨瓦解。
我哋早前寫過，除咗馮檢基，仲有多名民協成員有意出戰九西補選，包括屬中生代嘅莫嘉嫻同新生代嘅何啟明。已年屆六十三歲嘅阿基強行參選，無論最後當選與否，都勢必引發更多年輕及中堅黨員，因自覺上位無望而退黨。
白鴿公文袋勢撬樁腳
事實上，自民協喺去年立會選舉全軍覆沒後，已有多名區議員同資深黨員先後表態退黨，部分仲係想轉會去該黨嘅地區宿敵民主黨。雖然部分人其後獲挽留，但有得第一次就會有第二次。據聞民主黨已睇準今次民協敗選同內訌爭位嘅大好機會，隨時準備出手撬該黨喺九西及新界西嘅區議員同樁腳，將民協連根拔起。
料鄭家富再參選鎅票
新同盟方面，眾所周知范國威去年敗選，原因之一係畀前民主黨成員鄭家富鎅走部分樁腳同選票，三名新同盟區議員更因倒戈支持阿富而退黨。政界估計若果范國威出戰新東補選，同佢有私怨嘅鄭家富亦會再次參選（界刂）票，並且唔排除會有更多以前跟過阿富嘅新同盟成員倒戈。
雪上加霜嘅係，喺新東缺乏樁腳嘅公民黨，近年正積極挖區內嘅非建制區議員同樁腳，其中前新同盟成員容溟舟已正式加盟，據聞部分現任或前任民主黨及新同盟成員亦有意轉會。如果范國威喺補選中再次落敗，令人覺得新同盟已冇晒前途，退黨及轉會潮將會一觸即發。