中環出更：拋寶牒一擊即中 張學明話撞彩
大埔林村將於今年十二月三日舉行十年一次嘅林村鄉太平清醮，尋晚林村就舉行咗個「許願慈善之夜」為太平清醮籌款，仲筵開超過六十席兼以九大簋宴客，鄉議局主席劉業強、副主席張學明、林偉強等人都有出席撐場，林村長大嘅張學明仲大談林村傳統拋寶牒添。
張學明話，雖然林村居民未必年年都會去許願樹拋寶牒，但長大過程中就一定試過拋寶牒，佢當然都唔例外，更試過一擊即中添！咁究竟有咩拋寶牒嘅秘訣呢，點知佢就點都唔肯講，原因就係其實佢自己都係撞彩喎，認真謙虛喇。咁張學明又覺得許願樹靈唔靈驗呢？佢就話見仁見智，佢都係以平常心面對，認為任何事情都有可能。
嘆禁令減許願風氣
講起林村許願樹因承受唔住寶牒重量，已禁止市民拋寶牒，張學明就大嘆可惜，話大家都享受拋寶牒嘅感覺，但禁令就搞到許願風氣淡咗，好彩依家都有玻璃鋼新許願樹供市民拋寶牒，雖然唔係真樹，但都成功吸引到市民去拋寶牒。
林村每年都會舉行香港許願節，過往一直都係靠申請盛事基金嘅資助。張學明就話唔能夠次次都靠資助，最終都要「靠自己」去籌備，唔知佢又有咩好橋「撲水」呢？
卓妮