政情：馬清楠再考急救傍身 讚長者識保重身體
香港人夠晒長壽，唔少慈善團體都加重資源投放喺長者身上。日前保良局副主席馬清楠出席一間護老暨長者日間護理中心開幕禮，佢就話依家啲長者已經好識保重身體，日常飲食都知要少鹽少糖，但面對緊急情況時嘅知識就未必人人都識。佢嚟緊就會考急救考試，以備不時之需咁話。
自細已係聖約翰救傷隊成員
馬清楠係香港聖約翰救護機構理事會成員，佢自細已經係聖約翰救傷隊成員，所以識得急救知識。不過，急救試每三年就要考一次，所以佢嚟緊都要再考試，以免過期喎！咁佢會唔會建議長者都應該考急救試？佢就話長者照顧好自己已經足夠，唔使特登去考呢啲試，佢因為一路考開先至考啫！