政情：游梁遺禍加會審工務
青年新政游蕙禎同梁頌恆喺舊年十月因宣誓辱華風波兼衝擊會議，搞到立法會癱瘓咗兩個幾月，累到大部分委員會遲遲開唔到會，工務小組更積壓咗一大堆項目未審理。眼見議程大塞車，兼任財爺嘅財經事務及庫務局局長陳家強急到着火，前日緊急吹雞，去信工務小組要求加開會議，審理四十幾個積壓多時嘅項目。小組主席盧偉國都想開綠燈，即刻徵詢委員嘅意見，初步決定喺農曆新年前會加開會議，幫陳家強解燃眉之急，但過年之後係點就仲未有定案呀！
政府前日去信盧偉國，話政府將有大量工程同撥款項目要提交畀工務小組審議，當中涉及四十三個項目，所以要求小組一月及二月加開會議幫手疏導大塞車。信中無寫到邊幾個項目較緊急，但下周三（十一日）嘅議程就已編好先審議大埔、東涌嘅公屋地盤同基本工程儲備基金撥款。
盧偉國話基本工程儲備基金涉及百幾億港元，唔及時通過撥款嘅話，就會影響多個政府部門嘅工程同將來嘅房屋供應量喎。其實之前各個委員會都畀游梁嘅宣誓風波搞到無得準時開會，加上之前泛民同建制都冧友加入工務小組，審議項目進度已滯後咗好多，就算佢希望委員善用會議時間都好難喇！
月尾農曆新年 加會難度大
今個年度工務小組得嗰十幾節會議，加加埋埋三十幾個鐘，但政府前後有四十幾個工程同撥款項目，就算超音速一個鐘頭傾完一個項目都唔夠時間，根本就無得唔加會！參考番上一屆嘅經驗，小組起碼要用成八十個鐘先審得晒啲撥款，睇怕本年度「瘋狂加會」都在所難免，難怪盧偉國都慨嘆「加開會議已經成為常態」。
雖然政府已急如熱鍋上的螞蟻，但要加開會議都唔係咁容易。嚟緊月尾係農曆新年，預料唔少議員都要放假出門，初步只能喺過年前加開一節兩個鐘嘅會議，之後要等放完假先再同秘書處度時間。之後點搞，陳家強只有聽天由命嘞！
財會調議程 難阻泛民拉布
工務小組要加會，財務委員會今日嘅議程都有調動，政府將免費優質幼稚園教育計劃嘅撥款申請搬上頭位，繼而係惹火嘅問責官員加薪，原本排頭位嘅環保署相關撥款申請調到尾位，睇嚟都係想縮短泛民拉布嘅時間，但泛民早就講過要拖垮加薪撥款，仲會提早喺幼稚園撥款郁手，睇怕調動議程都幫助唔大。