中環出更：李秀恒遊內蒙 凍到着三條褲
近年香港冬天暖笠笠，唔少鍾意四季分明嘅人都覺得無癮。中華廠商聯合會會長李秀恒（Eddy）早前專程去內蒙古呼倫貝爾，參加著名嘅節慶活動《冰雪那達慕》。當地氣溫零下三十度，鍾意攝影嘅佢為咗捕捉靚相經常要喺室外逗留，結果要着三條褲、戴兩對手套，手心仲加多個暖包，但都係凍到幾乎撳唔到快門。Eddy笑言返到香港感覺特別溫暖喎。
Eddy話第一次去咁凍嘅地方，連某牌子相機都「瞓低」咗，好彩佢帶備多部相機及長短火鏡頭。明知咁凍都要去，皆因佢計劃影十個少數民族節慶活動，再舉辦攝影展及集結出書，之前已影咗雲南「潑水節」、貴州「六月六節」及西藏「雪頓節」，內蒙古係第四站。
海峰嶺於呼倫貝爾長大
睇番Eddy影嘅相真係靚爆，冰天雪地下，駱駝、雪橇及穿着五彩民族服飾嘅蒙古男女，構成一幅幅美麗畫面，勇士們騎馬競賽嘅場面更加震撼，捱凍都值得喇！
同行仲有香港內蒙古社團總會會長海峰嶺，佢係蒙古族人，自細喺呼倫貝爾長大。佢話「那達慕」意思係「遊戲」，為歷史悠久嘅草原傳統盛事，透過摔跤、射箭及賽馬等競賽，祈求神靈保祐平安吉祥。
海峰嶺太太高燕因為工作忙碌未能隨行，佢亦喺呼倫貝爾出生長大，來港定居三十幾年。
高燕話當地夏天只有兩個幾月，雖然嚴寒氣候下嘅生活好艱難，但係仍然好懷念，希望今次透過Eddy嘅鏡頭向外界展示草原牧民嘅頑強毅力。
卓妮