政情：潮玩「你問我答」 陳繁昌認唔乖仔
網上討論區最近興玩「你問我答」，香港科技大學校長陳繁昌都唔執輸，拍片玩埋一份。被學生問到讀書時期係乖學生、勤力學生、定係曳學生時，佢就好直接咁話「我話我係乖你都未必信啦」，仲承認當年自己唔係成日「摺拉」（即係喺圖書館溫書）。
學生時代興趣多多
咁啱科大今年廿五周年，陳繁昌拍咗條「你問我答」嘅片，仲放埋上facebook。喺片段中，雖然佢就直認唔係乖仔，但佢就話自己都唔係頑皮，仲形容自己係「百足咁多爪」。佢解釋，喺係當年自己有好多興趣，參加咗好多課外活動，包括打桌球同踢波。
另外，亦有學生問到點解科大冇港鐵站，佢解釋話已聯絡咗運輸署同港鐵，又話雖然唔會一朝一夕可以實現，但如果唔嘗試嘅話，就一定失敗。此外，仲有學生問佢科大有乜美食？佢就推介港式奶茶、蛋撻、四川麻辣牛肉麵，同埋佢最愛嘅清真烤雞肉（Chicken Shawarma）。