內地網絡有句流行講法︰不作死就不會死。好似香港咁，本來好地地，偏偏有班人無喇喇鼓吹咩「獨立自決」，搞到家嘈屋閉，社會撕裂，經濟民生完全冇人理，競爭力每況愈下，有人形容「港獨毒港」，可謂一針見血。
尋日有團體發表「全球城市競爭力排行榜」，結果紐約、東京同倫敦排名頭三位，至於發夢都掛住「紐倫港」嘅香港，排到冇雷公咁遠嘅第九位，比上海落後兩位唔在講，深圳嘅GDP以逾百分之八嘅速度增長，城市綜合競爭力已經逼近香港。團體話喎，港獨及社會內耗阻滯香港經濟發展，正如內地十年文革導致經濟崩潰，再咁落去實冇運行。
當局者迷，旁觀者清，港人係時候反省吓嘞。政治唔可以當飯食，睇吓兩岸三地近幾十年發展態勢就知，大陸由以前政治掛帥到依家聚精會神搞建設，一心一意謀發展，雖然空氣污染、食品安全等社會問題仲係一大籮，但發展成就的確有目共睹。反觀香港同台灣，「亞洲四小龍」年代不談政治，埋頭苦幹，不知幾架勢，但自從陷入政治化嘅無底深潭，就好似滾水淥豬腸咁，愈來愈縮，問你死未。呢，八、九十年代香港GDP佔國家整體約四分之一，家陣縮到不足百分之三，再咁落去遲早同香港面積一樣，可以忽略不計嘅咋。
或者有人會話，有錢唔係大晒，唯GDP論英雄呢套out喇。好，即管講心唔講金。尋日另一個由港大進行嘅調查顯示，市民對民生、經濟及政治嘅滿意度都係負值，其中政治狀況不滿比率更加近七成，創歷史新高。鬼咩，連起個故宮文化博物館都拗到面紅面綠，連過個新年都遊行示威雞犬不寧，唔心煩就假。
嗱，咪話功夫茶又搵香港同深圳比，人哋唔單止GDP就嚟爬香港頭，最緊要係掌握高科技核心產業，華為、騰訊、大疆無人機等高科技企業群集，可以話朝氣蓬勃；香港就唔同嘞，四大傳統經濟支柱搖搖欲墜，創新科技淨係得個講字，仲要排斥同內地合作，簡直愚不可及。今時今日唔少國家都爭住搭中國發展順風車，邊有人蠢到搞港獨倒自己米o架？就算唔講民族大義，區區七百萬人同十三億人根本冇得揮，開講有話，「唔夠人打就加入對方」，香港人出名精叻識走位，唔會唔明啩？
不過冇計喇，三十年河東，三十年河西，香港由小漁村發展成國際大都會花咗超過一個世紀，深圳三十幾年就做到，以前香港睇唔起深圳，家陣啱啱掉轉，幾年前有人鼓吹「深港同城」，兩地此長彼消，「深圳市香港區」怕且就有份！