政情：鍾國斌唔明：美國點解咁早開學？
有傳說話女兒係爸爸嘅前世情人，所以為人父係特別愛錫女兒。立法會紡織及製衣界議員鍾國斌（Felix）都唔例外，佢嘅愛女去美國讀大學，Felix竟然陪囡囡開學陪到去美國，原來佢個女係去芝加哥大學做交流生，認真係廿四孝老竇。不過，Felix就呻話美國啲大學早開學，仲話人哋咁早開學，啲學生哥邊有mood（心情）上堂喎。究竟Felix係擔心囡囡冇心機上堂，定係佢自己唔捨得個女咋？
廿四孝老竇 陪囡囡赴美
Felix今年元旦一過就第一時間飛咗去美國，原來佢係專登去美國陪囡囡開學。佢尋日就喺社交網站上載咗喺美國街頭嘅照片，話街上連人都唔多個，因為大部分人都仲係放緊假。Felix仲反問點解美國啲大學咁早開學，話啲學生哥都冇心情上堂，不如放多兩日仲實際咁話。其實香港唔少學校平時元旦翌日都已經要返學（口架）喇，美國大學早開學又咩咁出奇，定係Felix想囡囡可以陪佢周圍去玩多幾日呢？