政情：莫乃光藉鬥獸棋籲IT人發聲
鬥獸棋唔少人細個都玩過，立法會資訊科技界議員莫乃光（Charles）就同香港資訊科技商會榮譽會長方保僑（Francis），玩鬥獸棋玩到去社交網站平台facebook（fb）香港總部。Charles更以鬥獸棋暗喻今年三月舉行嘅特首選舉，話將有好多古靈精怪嘅動物會爭做萬獸之王，呼籲資訊科技（IT）界朋友要多啲發聲，表達業界訴求。
Charles同Francis到fb香港總部參觀，Charles就話今年頭幾個月將有好多動物出嚟爭做萬獸之王，IT界都希望可用IT改變香港、改善市民生活，亦希望業內有多啲好工，即「人工高、工時短」。不過，Charles一度講錯「好工即係人工低」，好彩佢即時發現同改番。
而Francis就話IT界多啲發展機會唔止只係IT界得益，IT更可以令香港升格，希望政府為咗業界發展多啲同外國公司聯繫，唔好只着重同內地合作咁話。