中環出更：蕭亮聲退出民協 傳轉投白鴿黨
民協喺今屆立法會選舉全軍盡墨，黨內亦因此出現嚴重分裂，繼早前多個民協區議員表明萌生去意後，再有區議員宣布退黨！九龍城區議員蕭亮聲尋日喺facebook（fb）宣布退出民協，指自己將會喺唔同嘅崗位上繼續為香港實現真普選而努力。據了解，蕭亮聲退黨係因為不滿民協喺選舉中失去議席，認為民協前景暗淡，有指佢將會轉投民主黨（白鴿黨）。
蕭亮聲尋日喺fb宣布自己喺上周六已經向民協遞交退黨信，佢感謝民協過去十多年嘅提攜同照顧，但未有交代退黨嘅原因。民協主席施德來接受查詢時話，該黨日前收到蕭亮聲嘅退黨通知，多次挽留失敗，蕭亮聲嘅退黨申請會交中委會處理。施德來又話，民協目前面對艱難時刻，希望黨友可以一同捱過。
有指民協立會大敗後現離心
據知，蕭亮聲喺今屆立法會選舉之後已經出現離心，認為民協失去立法會議席前景未明，決定退黨尋求其他發展。對於傳聞指蕭亮聲將轉投白鴿黨，白鴿黨就話暫未收到任何入黨申請，若有人申請會按程序處理。
卓妮