綠色先鋒：遮布再擋雨
善用棄置遮布，縫出新用途！颱風或滂沱大雨後，街上總會充斥不少被吹壞或被棄置的雨傘，斷遮骨或被吹得東歪西倒的雨傘，看似「救無可救」，但有環保團體看中它們身上完好無缺的遮布，收集後一針一線，將遮布縫成有用雨衣、環保袋和背囊防水袋，希望藉此感染更多港人，明白源頭減廢的重要性，將遮布「重生」。
「尼龍質地嘅遮布，防水性高，係一種好實用嘅布嚟。」環保團體「遮布重生」義工鄧小姐一邊向記者解說，一邊教授身邊的義工，大家落手落腳，處理收集得來的遮布，「打完風或紅雨、黑雨後，都會有好多爛遮，被棄置喺街或垃圾桶，我哋會去執佢番嚟，街上亦有幾個收集點，收集呢啲雨傘。」鄧小姐指出，收集得來的遮布會視乎大小，循環再造，成為不同東西，如面積較大的遮布，只要簡單加上繩和鈕扣，便可縫製成背囊防水袋。
「平時我哋久唔久就會聚埋一齊開工作坊，最多就係用遮布做雨褸。」鄧表示，不少弱勢社群為「慳錢」，不願意花錢買雨傘或雨衣，有見及此，團體義工首選縫製雨衣，然後親身「落區」送給有需要人士，「啲公公婆婆收到會好開心。另外，我哋希望愈來愈多人有呢個諗法，就係遮骨壞咗，唔好即刻掉咗佢，只要花少少心思，壞咗嘅遮都可以變成有用嘅嘢。」
兩組織合作做「雨傘醫生」
遮布重生的環保理念，除吸引愈來愈多義工加入，亦吸引了一個「姊妹」團體「雨遮重生」合作，發揮「雨傘醫生」作用。「我哋會檢查啲遮壞得嚴唔嚴重，仲有得整嘅，我哋會整番好佢，之後送畀一啲老人院，等啲長者有得用。」「雨遮重生」義工Christina指出，團體會定期開班授徒，由較資深義工傳授修遮技巧，以尖嘴鉗、剪刀及三角銼等工具，將一把把雨傘「醫好」，她希望可做到源頭減廢，「整唔番就話啫，整得番嘅，就盡量唔好買新遮啦，唔好嘥嘢嘛。」
文：陳名仲
攝：甘偉倫