政情：陳穎欣維持長髮LOOK 免街坊唔認得

好多女士都鍾意長髮Look，但要打理呢把長髮真係唔容易㗎，仲會帶嚟好多煩惱。好似深水埗區議員陳穎欣咁，尋日喺添馬公園出席一個政黨活動時，被大風吹至頭髮凌亂，佢笑指曾經一度考慮將頭髮剪短，但就怕街坊唔認得佢喎。

陳穎欣話呢把長頭髮已經成為佢嘅標誌，自己嘅妹妹亦有一頭長髮，有時同佢一齊擺街站，啲街坊都會認錯，妹妹就好似佢嘅分身咁，好多時有街坊見到兩姊妹其中一個，行多兩步又發現另一個相似嘅人，都會覺得有啲驚訝，亦試過妹妹喺佢個選區出現時，曾有街坊錯認妹妹係佢，向妹妹求助區內嘅問題添！