政情：民主派乜都反 「憤」強睇唔過眼
今屆政府只剩下半年多任期，已宣布唔競逐連任嘅特首梁振英（CY）就被翻舊帳，無論係房屋、安老及退休保障等由現屆政府提出嘅政策，都被民主派鬧到體無完膚。曾擔任行政會議成員嘅香港黃金五十創辦人林奮強可能都睇唔過眼，尋日出席一個論壇時開腔鬧爆民主派係又反唔係又反，任何事以政治取向為先，批評民主派根本係唔想幫手解決問題。
外界不斷批評CY令社會出現矛盾、破壞行政立法關係、甚至係用人唯親，令施政寸步難行，乜嘢都做唔到。但林奮強喺論壇上鬧爆民主派過去四年半一貫都係不講事實，先講政治取向同攞道德高地，之後就不斷地提出指控，但最尾又要扮晒嘢話和諧最緊要。佢舉例稱，有疑似候選人仲未宣布要參選就已被民主派鬧爆，批評民主派中人根本唔係想幫手解決問題，仲勸佢哋唔該「文明少少」講吓道理喎。
區諾軒反擊遭駁回
畀林奮強兜口兜面鬧，身兼民主黨區議員嘅民陣召集人區諾軒當然唔忿氣，跟住連珠炮發，批評政府冇解決過房屋問題，又數番上屆政府停建居屋，到CY年代盲搶地，將過去政府土地政策嘅倫理完全置之不理，跟住又鬧埋扶貧委員會處理退保問題時，連開會想討論有審查方案都唔畀，仲要逼學者周永新寫一份啱佢哋心水嘅研究報告。
但林奮強冇被嚇倒，接住反駁指未來十年長者人數將會大增，過去十八年一間醫院都冇起過，但立法會只執着討論退保方案呢個議題，反問若現時提出唔審查就個個派五千蚊方案，但醫院又唔起、老人院不起、劍橋同康橋事件全部都唔處理，咁係咪叫做對長者好？佢又話現時社會有太多問題積壓，即使新特首上任都要進入一個比現時「更熱嘅廚房」，仲寸爆區諾軒，話若要一個「和諧嘅特首」不如去選聖誕老人，又說「佢（聖誕老人）最祥和(口架)啦！」
自稱同CY「唔係好親」
當CY被批評用人唯親，論壇嘅主持人問林奮強「你都係佢用嘅其中一個人」，佢就否認係「梁粉」，又話同CY「唔係好親」，自己入行會前只見過CY兩次，第一次仲係廿幾年前。