中環出更：亂爆齊昕病情 李慧琼認衰
特首梁振英早前宣布因家庭理由不尋求連任，外界估計同佢個女齊昕嘅健康情況有關，而民建聯主席李慧琼其後喺一個網台訪問中爆出，齊昕病情係好差，五日後就遭特首夫人梁唐青儀否認，並批評佢武斷，指齊昕健康好好。李慧琼尋日出席一個活動時認衰，話當時有咁嘅說法係因為自己誤會。
稱因誤會而起
李慧琼話事後仍未有機會見到梁太，但曾向梁振英反映，相信係自己誤會，「如果因為誤會而導致有任何不愉快，都係因為誤會而起」。佢又話當時有咁嘅說法係因為「相信特首係因為家庭緣故，作為一個主要考慮去不競逐連任」，又指開心見到齊昕身體好好，希望佢早日康復。
話說李慧琼喺上月二十一日出席網台節目時，大爆齊昕病情係好差，又話齊昕同梁太「唔啱」係事實，「係人都知」，但五日後就遭梁太否認，指「齊昕（健康狀況）好好」，並點名批評李慧琼嘅言論係一己私下嘅揣測，係片面嘅認知、與事實不符，甚至大鬧佢「武斷」，對其言論表示遺憾。
卓妮